एटीएम कार्डची मुदत संपली
आहे. क्रेडिट कार्डची
पत वाढविण्यात येत असल्याचे फोनवरून सांगून भामटे स्वत: बँकेचा
अधिकारी असल्याचे बतावणी करतात. बर्‍याचदा
ते क्रेडिट कार्ड, डेबिट कार्ड अथवा एटीएम कार्डवरील नंबर वाचून
सांगा अथवा कार्ड बंद होईल, असे सांगतात. त्यांच्यावर विश्‍वास ठेवून नागरिक एटीएम कार्ड,
डेबिट कार्डवरील नंबर सांगून मोकळे होतात. सायबर
गुन्हेगार त्या क्रमांकाच्या आधारे दुसरे एटीएम कार्ड तयार करतात अथवा त्या नंबरच्या
आधारे ऑनलाईन खरेदी करून लाखो रुपयांना चुना लावतात. इंटरनेट, संगणक
आणि मोबाईलच्या वापरासोबत या साधनांचा वापर करून गुन्हे करणार्‍यांची संख्या झपाट्याने वाढू लागली आहे. विशेषत:
एटीएम कार्ड, डेबिट कार्ड आणि क्रेडिट कार्डचा
क्रमांक आणि पासवर्ड मिळवून ऑनलाईन गंडविण्याच्या घटना वाढल्या आहेत. हे लोण आता ग्रामीण भागातही पोहचले आहे.
ऑनलाईन फसवणूक
झाल्याच्या घटना वर्तामानपत्रे, न्यूज चॅनेलच्या वाहिन्यांवर
पाहायला मिळत आहेत. मोबाईल वापरकर्त्यांची संख्या वाढल्याने सायबर
गुन्ह्यांची संख्याही वाढली आहे. सायबर गुन्हेगार हे जगाच्या
पाठीवर कोठेही बसून गुन्हे करीत असतात. त्यामुळे सायबर गुन्ह्यांचा
तपास करण्यात अडचणी येत आहेत. यातून आपली फसवणूक टाळण्यासाठी एटीएम कार्डची माहिती कुणाला ही देऊ नका, याबाबत
जनजागृती करण्याबरोबरच संबंधित बँकांनी आपल्या ग्राहकांना कार्यशाळा घेऊन प्रशिक्षण
देण्याची गरज आहे. ग्राहकांनीही ऑनलाईन गंडविण्याचे प्रकार वाढत
असल्याने कोणत्याही व्यक्तीला एटीएम कार्ड, डेबिट कार्ड अथवा
क्रेडिट कार्डचे पिन नंबर, ओटीपी नंबर अथवा अन्य कोणतेही क्रमांक
देऊ नये. कोणत्याही बँका अशाप्रकारची माहिती मागवत नाहीत.-मच्छिंद्र ऐनापुरे, जत(सांगली)
कोणत्याही टिप्पण्‍या नाहीत:
टिप्पणी पोस्ट करा